Помпео ја охрабри Србија да се фокусира на продолжување на дијалогот со Косово
Објавено во: Балкан 21 Август, 2019
Американскиот државен секретар Мајк Помпео за време на состанокот со српскиот претседател Александар Вучиќ во Њујорк изјави дека ја охрабрува Србија да се фокусира на стратешка цел - членство во ЕУ и да продолжи со дијалогот со Косово, соопшти Стејт департментот.
Помпео и Вучиќ разговараа за билатералната визија за стабилен, безбеден и просперитетен регион на Западен Балкан и ја продолжија поддршката на САД за патот на Србија кон Европската унија, пренесуваат медиумите од регионот.
„Секретарот Помпео ја охрабри Србија да се фокусира на таа стратешка цел со забрзување на реформите и да продолжи со дијалогот со Косово за сеопфатна нормализација на односите што води кон взаемно признавање“, се вели во соопштението на Стејт департментот.
Помпео повтори дека обете страни треба да избегнуваат провокации што го попречуваат процесот на нормализација и да се вклучат во духот на компромис и флексибилност што е неопходно за постигнување договор и искористување на потенцијалот на двете земји.