ПОПЛАКИТЕ И ЗАБРАНАТА НЕ ГИ СПРЕЧИЈА - Кафулињата „Интермецо“ и „Мош“ и понатаму работат

Добивај вести на Viber

Иако беше најавено дека ќе бидат затворени, баровите „Интермецо“ и „Мош“ и понатаму функционираат како и вообичаено. 

Градоначалникот на општина Центар, Горан Герасимовски посочува оти наместо како барови тие работеле како дискотеки во густо населени места и било голем проблем со кој се соочувале во Општина Центар. Тој посочи дека во општината пристигнувале многу поплаки од жителите на Капиштец за истите локали за кои неколкупати досега општината изрекла казнени решенија.

- Ние како општина правиме мерење на бучава и изминатиот период истите барови беа казнети со високи казни од 800 000 денари и во наредниот период ќе продолжиме со акциите. Проблемот е малку поголем поради тоа што истите не работат како барови туку како дискотеки во густо населени населби и со самата гужва и фреквенција на автомобили не само гласна музика прави проблеми со паркирање, со хигиена итн. Најголем проблем особено во Капиштец е токму гласната музика и токму овие неколку барови коишто се на тој потег и за истите во наредниот период ќе направиме напор да преку поголем број на акции ги решиме сите овие проблеми со кои се соочуваат граѓаните“, изјави Герасимовски на Телевизија 24.

Инспекторите на Општина Центар минатата недела во заедничка акција со Државниот пазарен инспекторат направија контроли во кафулињата „Интермецо“ и Мош“. Поради непочитување на работното време во ноќните часови пазарната инспекција изготви записници за затворање и забрана за работа од 10 дена.

Герасимовски пред три дена објави дека кафулињата веднаш ќе бидат затворени, односно другиот ден по направените контроли. 

- Решенијата локалите треба да ги добијат во текот на денешниот ден по што веднаш ќе бидат пломбирани - напиша тој на Фејсбук.