Поранешниот бугарски претседател Росен Плевнелиев: Попис во Македонија за да се види колку Бугари има
Објавено во: Македонија 30 Ноември, 2020
И поранешниот претседател на Бугарија, Росен Плевнелиев, во својата анализа за 24 Часа за македонско-бугарските односи смета дека Македонија треба да се откаже од наследството и идеологијата на „комунистичкиот диктатор Тито“
„Големата драма на Владата на Република Северна Македонија не е Бугарија, туку прво - наследството и идеологијата на комунистичкиот диктатор Тито, поддржана од силно српско-руско влијание, и второ – идејата за „Голема Албанија“, која е фиксирана во сознанието на Албанците во Северна Македонија. Второто е навистина големиот проблем и тој може да биде решен само ако Република Северна Македонија и Република Албанија преговаарат и се присоединат во ЕУ заедно“, пишува Плевнелиев.
Како што вели тој, на овој план Албанија веќе превземала конкретни чекори - го осудила комунистичкиот режим, ги отворила архивите на тајните служби, ги сменила учебниците според неманипулирана историја за комунистичката диктатура, спровела попис и го гарантирала постоењето и правата на различни малцинства, вклучително и на бугарското. Во Македонија пак, тврди тој, Тито и Сталин се претставени како херои, архивите остануваат нечепнати исто како и учебниците,и дека во земјата не е спроведен попис и дека продолжува одрекувањето оти постојат граѓани со бугарско етничко потекло.
„Раководството во Скопје не треба да очекува дека Бугарија ќе се откаже од богатата историја под меѓународен пристисок. Не е добар план премиерот Заев да продолжува да настојува за македонско малцинство во Бугарија, бидејќи тоа никогаш не постоело. Во Скопје се загрижени дека Бугарија нема да го признае нивниот идентитет и јазик. Тоа не е вистина“, тврди поранешниот шеф на Бугарија.
Неговото мислење е дека длабоката разочараност во Бугаријја се должи на тоа што Договорот за добрососедство не ги дава очекуваните резултати, односно дека нема промена во учебниците, видлив е говорот на омраза кон граѓаните со бугарско потекло и останува наративот проектиран од времето на Тито дека тие се ‘татари, фашисти и окупатори'".