Постојат само две опции за Бугарија да даде зелено светло за преговори, вели Јотова

Добивај вести на Viber

Од Софија стигнуваат пораки во кој случај тие би можеле да го тргнат ветото за преговорите на земјава со Европската Унија. 

Потпретседателката на Бугарија, Илијана Јотова вели дека имаат  цврста и консензуална позиција кон Македонија. 

Но, според неа, Софија нема да отстапи од барањата и „постојат само две опции за Бугарија да даде зелено светло за преговарачката рамка за Северна Македонија со ЕУ, со кои треба да се вметнат бугарските барања за почитување на Договорот за добрососедство, пријателство и соработка меѓу двете земји“.

„Или ќе инсистираме во преговарачката рамка за Република Северна Македонија да има последно 35-то поглавје и за време на процесот на преговори да следиме дали се почитува Договорот за добрососедство или во неа да се вметнат барањата на Бугарија за почитување на Договорот“, рече Јотова.

Таа не одговори на прашањето за издадените бугарски пасоши на македонски граѓани и дали се зголемува бројот на барања.

„Имаме заедничка рамковна позиција со Владата. Сепак, има пропуст што речиси една година изгубивме да им ја објасниме позицијата на нашите европски партнери и да ги придобиеме на наша страна“, изјави Јотова за Бугарската национална телевизија (БНТ).  

Бугарија не дозволи Македонија да ги почне преговорите со Еверопската Унија. Македонската страна се надева дека ќе има промена на позицијата напролет по изборите кај соседот, но оттаму неколку пати повторија дека изборите нема ништо да сменат.