ПОВЕЌЕ ОД 60 ЗАРАЗЕНИ ВО ШТИПСКИТЕ КОНФЕКЦИИ: Во градот има најголем број новозаразени од почетокот на епидемијата

Добивај вести на Viber

Се разгорува епидемијата на корона вирусот во Штип. Најголемиот број новозаразени се од петте штипски фабрики, за кои Фактор пишуваше претходно.

Од Центарот за јавно здравје на Штип потврдуваат дека бројката на вработени во конфекциите се зголемува, па сега изнесува шешто повеќе од 60 вработени кои се позитивни на корона вирусот.

-Денеска имаме највисока бројка на новозаразени од почетокот на епидемијата. Освен во петте конфекциски фабрики, денеска имаме и нов случај на инфициран вработен во уште една конфекција. Некои работат делумно, односно затвораат одредени погони, некои дури и денеска се на работните места, а некои пак целосно ги затворија погоните до понеделник. Според последниот 24 часовен пресек, во Штип денеска е највисока бројката на новозаразени, велат од Центарот за јавно здравје на Штип.

Инаку, како што претходно пишуваше Фактор, според изјавите на здравствените работници во Штип, постои голем ризик бројот на инфицирани со Ковид и понатаму да расте, особено меѓу работниците во фабриките, бидејќи станува збор за повеќе од 1.000 луѓе. 

Освен тоа, не се почитуваат ни мерките за заштита, односно носењето маска по улиците на Штип е реткост. 

-Денеска имаме сосема различна глетка, граѓаните кои излегоа на гласање беа сите со маски и ги почитуваа протоколите, но до вчера ситуацијата беше сосема поинаква, затоа расте и бројот на новозаразените. За жал, најверојатно истата практика ќе продолжи и по овој изборен ден, велат од Центарот за јавно здравје на Штип. 

Оттаму стравуваат дека многу бавно ќе оди ставањето под контрола на состојбата со корона вирусот

А.Б.