ПОВЕЌЕ ЗЕМЈИ НА ГОТОВС: Во Италија празни рафтови
Објавено во: Свет 24 Февруари, 2020
Во повеќе земји властите се подготвуваат за евентуална појава на коронавирус.
Во просториите на Центарот за управување со кризи во тек е вонреден состанок на кој се разговара за состојбата и опасноста од коронавирус во Македонија.
Министри и претставници од седум грчки министерства, учествуваа на денешниот состанок во премиерската палата, посветен на епидемијата на новиот коронавирус.
Од Клиниката за инфективни болести во Загреб известуваат дека во тек е тестирање на вкупно шест примероци на коронавирус (КОВИД-19), по еден од Сплит и Ријека и по два примероци од Загреб и Сисак.
Информациите за резултатите ќе бидат достапни по завршување на тестирањето, преку здравствените установи, од каде се испратени примероците на тестирање на Клиниката за инфективни болести во Загреб, согласно со Општата регулатива за заштита на податоци.
Во досегашните тестирања во Клиниката ниту еден примерок не бил позитивен на новиот коронавирус.
Во Италија е регистриран шестиот смртен случај од коронавирус, а се работи за жена која боледувала од канцер.
Таа вчера е префрлена во болница во Бреша, вториот по големина град во областа Ломбардија, каде е утврдено дека е заразена со новиот коронавирус.
Тоа е петта жртва во областа Ломбардија, а едно лице почина во областа Венето.
Шефот на државната служба за цивилна заштита Анџело Борели изјави денеска дека 219 лица во Италија се заразени со Ковид-19.
Појавата на опасниот вирус во Италија буквално ги избезуми жителите на Апенинскиот Полуостров. Корисници на социјалната мрежа Твитер објавија неколку видеа на кои може да се забележат празните рафтови во италијанските супермаркети.