Пожарите во Грција земаа уште еден живот

Добивај вести на Viber

Почина 78-годишна жена од Мати која имала хронични здравствени проблеми и била на интензивна нега во болница, по пожарите. 

Бројот на загинати во пожарот во источниот дел на Атика, во близина на Атина, се зголеми на 93 лица, откако денеска во болница почина жената. 

Вчера грчките обвинители добија детали за 92 жртви, вклучувајќи и две неидентификувани лица, како дел од истрагата.

Цели семејства, баби и дедовци со внучиња, мајка со син, татко со две деца, брачни парови, странски државјани, две неидентификувани лица, 44 жени, 35 мажи и 11 деца содржи листата на 92. загинати во катастрофалните пожари во источниот дел на областа Атика на 23 јули, јави дописничката на МИА од Атина.

Повеќе од две седмици по трагедијата, од Генералниот секретаријат за цивилна заштита ги објавија имињата на загинатите лица.

Најмладата жртва е 6-месечно бебе, а најстарата 95-годишна жена.

Загинатите деца се родени меѓу 2007 и 2013 година.

Информациите треба да им помогнат на обвинителите при контактот и повикувањето на роднините на загинатите и другите преживеани во пожарите да дадат исказ со цел собирање докази.

Властите планираат уривање на околу 3 200 дивоградби во Атика и околината.

Вчера нов пожар имаше во овој дел на Грција, но немаше сериозни штети или жртви.