Позната последната пречка зошто Заев уште не му се јавува на Ципрас
Објавено во: Македонија 05 Јуни, 2018
Како да се напише јазикот во графата во Обединетите нации е последната пречка што ја водат македонската и грчката влада пред договорот да биде официјализиран, велат дипломатските извори на Канал 5.
Јазикот ќе биде именуван како „македонски“, што било договорено од поодамна, но Грција бара тој да биде напишан во оргиналната форма, со латинична транскрипција, како „makedonski“, што всушност беше предлог и на медијаторот Нимиц на самиот почеток од преговорите. На ваков начин, сметаат дека ќе се опише словенското потекло на јазикот.
Позицијата на македонската страна ова е целосно неприфатливо, во услови кога и сега, во графата во Обединетите нации јазикот е запишан со превод на англиски како „Мacedonian“ , како и со превод на француски.
Ова прашање се сметаше за затворено, а го потврди и премиерот Заев, на прес-конференцијата минатата недела, кога го најави договорот.
По оваа изјава на Заев, Нова демократија преку соопштение го прозва Ципрас да каже дали навистина прифатил признавање на македонски јазик и македонски идентитет.
Како ќе се надмине оваа последна пречка за официјализирање на Договорот, останува да се види следните денови, иако месеците наназад како можен компромис се споменува именувањето да биде „Macedonian“ но со ѕвездичка, која ќе објаснува дека станува збор за јазик од словенската група на јазици.