Добивај вести на Viber
Ќе го чешлаат ли пратениците во Собранието работењето на Еуростандард банка во стечај на бизнисменот Трифун Костовски и на неговиот син Коста.
Тоа го бара пратеничката група на ВМРО-ДПМНЕ. Таа ќе инсистира во парламентот да се расправа за тоа колку биле почитувани законите, но и кои се точно причините што ја доведоа до стечај оваа банкарскла институција.
Пратеничката група на ВМРО-ДПМНЕ поднела иницијатива за одржување надзорна расправа за овој случај. Иницијативата е насловена како „Утврдување на причините и извршувањето на законите во постапката за доведување до стечај на Еуростандард банка“ од опозициската партија бараат да биде ставена на гласање на првата наредна седница на Комисијата за финансирање и буџет.
Пратениците на ВМРО-ДПМНЕ сметаат дека за пропаѓањето на банката треба да се произнесат и стручњаци.
На својот фејсбук-профил пратеникот на ВМРО-ДПМНЕ Антонио Милошоски напиша дека пропаѓањето на Еуростандард банка е македонскиот втор ТАТ.
„Кои фирми имале корист од милионски кредити, дали овие фирми биле блиски до фамилијата на власт и колку високи функционери, членови на владата, знаеле предвреме за стечајот на банката? Наскоро, по иницијатива на ВМРО-ДПМНЕ, Собранието ќе расправа на оваа тема и ќе се откријат многу сериозни манипулации“, напиша Милошоски.
А како што веќе пишуваше Фактор, бизнисменот Трифун Костовски вчера рече дека пари од банката се одлевале во струмичкиот регион, на што, како што тврди сопственикот, помогнал поранешниот директор на банката, кој, пак, бил припадник на СДСМ.
Од СДСМ за Фактор тврдат дека немаат ништо со неуспешното работење на банката, и ги охрабруваат надлежните институции да го истражат случајот.
А Николче Патковски, пак, рече дека не сака да ги коментира наводитена неговиот поранешен газда, и исто така, вели дека разврска ќе има преку надлежните институции.