Пратеник од коалицијата „Можеме“ се побуни против најавата на Груби за субвенционирање на вработувања по етнички клуч
Објавено во: Македонија 17 Септември, 2020
Мирослав Богдановски, пратеникот од коалицијата „Можеме“ и припадник на владеачкото парламентарно мнозинство во Собранието, е еден од првите кој се побуни против најавата на првиот вицепремиер Артан Груби за субвенционирање на вработувањата во приватниот сектор за правична етничка застапеност.
„Владата ќе ги субвенционира приватните компании кои ќе вработат Албанци или граѓани од другите помали етнички заедници.Сите компании кои ќе ја запазат правичната застапеност ќе бидат помогнати од Владата“, најави генералниот секретар на ДУИ во дебатниот магазин „Click Plus“ на ТВ21. Груби додаде дека оваа мерка во Влада ќе се разгледува во следниот период.
Но на ова веднаш реагираше пратеникот од ДОМ, инаку дел од коалицијата „Можеме“, која освои најмногу гласови на последните парламентарни избори.
„Класична дискриминација, со државни пари да се субвенционираат приватни фирми да не се вработуваат Македонци е навистина неприфатливо и недозволиво !!!“, напиша Богдановски синоќа на Фејсбук.
Тој е поранешен раководител на Секторот инспекторат на Град Скопје и поранешен директор на Државниот инспекторат за животна средина.
ДУИ пред изборите бараше да се субвенционираат 50 проценти од социјалните придонеси во наредните три години за секое ново работно место што ќе ја подобри „правичната и соодветна застапеност на сите етнички заедници во приватните претпријатија“.
„Владата ќе го повика, охрабри и ќе соработува со бизнис секторот т.е. домашните и странски компании да ги поддржат добрите меѓуетнички односи и вредностите на толеранција, застапеност и меѓусебна доверба и во нивните работни средини, за да се искористи целокупниот човечки потенцијал со кој располага нашата земја“, стои во владината програма.