Пратеникот Ацевски потврди дека сопругата го пријавила, но не за физичко насилство
Објавено во: Македонија 28 Ноември, 2019
Костадин Ацевски, пратеникот на СДСМ, ги демантира проопозициските медиуми дека се користел со физичко насилство над својата сопруга со која не живее заедно, а тоа го потврдува и билтенот на МВР.
– Ниту физички сум ја нападнал сопругата, ниту сум го повишил гласот кон неа. Веќе извесно време живееме одвено и таа вчера дојде дома и рече дека сака да остане тука поради децата. Реков дека тогаш јас ќе си одам, а синовите сакаа да дојдат со мене. Тука настана недоразбирањето, по што таа се јави во полиција. Да имаше насилство, веднаш ќе поднесев оставка. Децата ми се поважни од функцијата – вели Ацевски за Фокус.
Утрово проопозициски медиуми најпрво објавија дека пратеник од СДСМ ја претепал својата сопруга, а потоа беше откриен неговиот идентитет, по што пратеникот од Ѓорче Петров наиде на лавина негативни коментари од редовите на опозицијата, иако во билтенот на МБР не пишува такво нешто.
„На 27.11.2019 год во 21,30 часот во СВР Скопје се јавила М. А. (37) од Скопје и пријавила дека сопругот К.А. (40) од Скопје се расправал со неа и сакал да ги земе со него нивните деца. Полициски службеници излегле на местото на пријавата за расчистување на случајот“ стои во информацијата од МВР.