Пратеникот Сашко Костов објаснува: Настан имаше, но не како што опишаа медиумите
Објавено во: Македонија 13 Декември, 2019
Пратеникот Сашко Костов од СДСМ, за чија ќерка медиумите пишуваа дека имало обид за киднапирање на неговата седумгодишна ќерка, за Фактор вели дека „настан имало, но не до толку како што го опишаа медиумите“.
Тој додека разговаравме телефонски патуваше за Скопје, каде по разговор со координаторот на пратеничката група на СДСМ, планира да даде изјава за медиумите, која, како што ни рече, ќе биде еден вид појаснување за тоа што се случило.
Повеќе не сакаше да објасни, вели се ќе каже денеска во Собранието, пред целата јавност.
На нашето прашање, во кого се сомнева дека би посегнал по таков чин, за што веќе и излегоа сомнежи во медиумите, вели дека „Сомнежи има, но органите си ја работат работата. Се надевам дека ќе завршат за два три дена, по што работите ќе бидат многу појасни“, вели Костов.
Од МВР се уште нема детали.
Телевизија „Сител“ утрово пренесува дека непознати лица се обиделе да грабнат седумгодишна ќерка на пратеник од СДСМ. Настанот бил е пријавен во полиција. Настанот се случил во средата во 11:45 во Кочани кога детето се враќало од училиште и возило со странски регистарски таблички ја пресретнало и од автомобилот излегле непознати лица со локален дијалект кои побарале од него да влезе внатре. Но во тој момент на местото се затекнал дедото на малолетното девојче по што сомнителните лица се откажале од намерата и побегнале.