Предметите на СЈО спакувани, денеска започнува селењето на материјалите
Објавено во: Македонија 13 Септември, 2019
СЈО од денес ги сели сите предмети кај Основното јавно обвинителство по меѓусебната кореспонденција што се одвиваше деновиве и одлуката да се предадат материјалите пред истекот на мандатот на специјалната обвинителка Катица Јанева на 15 септември и во ситуацијата кога нема изгледи дека ќе се донесе нов закон за продолжување на неговата работа.
Од Специјалното јавно обвинителство вчера потврдија дека се подготвени за трансферот, а републичкиот јавен обвинител Љубомир Јовески наведе дека сите технички процедури за преселбата на „бомбите“ и доказите се веќе договорени.
Како што беше вчера најавено, секој обвинител најверојатно ќе треба да го спакува својот предмет, но пред тоа да го попише и архивира. Истата процедура ќе важи и за истрагите и предистрагите. На тој начин ќе му бидат отстапени на Јовески, а можно е физички и воопшто да не бидат изнесени, бидејќи зградата на СЈО останува во сопственост на Јавното обвинителство понатаму.
Во моментов непознато е како ќе се распоредат понатаму вработените на СЈО, но и како ќе се одредува кој ќе ги застапува нивните предмети понатаму.