Продажбата на „Витаминка“ порасна 10 отсто и достигна 28 милиони евра

Добивај вести на Viber

Прилепската прехранбено - кондиторска индустрија одлично го зголемува пазарното учество на домашниот пазар и во странство. И тоа е најважната вест за нејзните акционери. На прав пат се! „Витаминка“ си прави поголем простор на домашниот пазар, но и на странските пазари. Приходите од продажба се повисоки за 2,6 милиони евра во услови кога оперативните расходи пораснале 1,8 милиони евра во однос на лани. Оперативната добивка е пониска од лани заради нивото на залихи, а дополнително негативно на нето добивката влијае нивото на финансиските расходи

Најголемата доминантно домашно поседувана прехранбена компанија „Витаминка“ има одлични резулати при освојувањето на пазарот во земјава и во странство во првите девет месеци годинава. „Витаминка“ во споредба со лани во првите девет месеци годинава ги зголеми приходите од продажба за 10 отсто односно за 2,63 милиони евра. Продажбата на домашниот пазар до крај на септември на „Витаминка“ и донесе 16,67 милиони евра што е 10 отсто повеќе од лани. Извозот, од процентуален аспект расте повеќе од освојувањето на домашниот пазар. За првите девет месеци „Витаминка“ во странство продала производи во вредност од 11,26 милиони евра и тоа е 12 отсто повеќе од истиот период лани. Во овој период нивото на залихи (од почеток на година до крај на септември) книговодствено е намалено за 1,32 милиони евра. Лани во истиот период нивото на залихи на крај на септември е поголемо за 400.000 евра во однос на нивото од почетокот на минатата година.

Оперативните расходи, очекувано, растат заради зголемувањето на приходите од продажба. Тие за првите девет месеци изнесуваат 26,8 милиони евра. Во споредба со лани се повисоки за 1,8 милиони евра. Но заради залихите оперативната добивка е на ниво од 481.000 евра што е за 56 отсто пониско од истиот период лани кога изнесувала 1,1 милиони евра.

Дополнително врз намалување на добивката влијае и негативниот сооднос од 307.000 евра меѓу финансиските приходи и финансиските расходи во првите девет месеци. Нето добивката на „Витаминка“ во првите девет месеци изнесува 157.000 евра и таа е за 79 отсто пониска од лани кога за истиот период изнесувала 755.000 евра.

Р.Ф.