Добивај вести на Viber
И официјално е потврдена првата жртва од немирите во Турција. Дваесетгодишно момче загинало во такси кое било нападнато од група демонстранти на булевар во Истанбул за време на антивладин протест. Во инцидентот се повредени четири други луѓе од кои еден е во тешка состојба.
И денеска со солзавец турската полиција ги бркаше демонстрантите во главниот град Анкара. Полицијата го употреби гасот откако повеќе од илјада демонстранти, претежно млади луѓе се доближија до централниот плоштад Казалај скандирајќи „Таип поднеси оставка“.
Нови судири меѓу демонстрантите и турската полиција избија и во Истанбул, а главните собири биле пред канцеларијата на премиерот Реџеп Тајип Ердоган. Само минатата ноќ уапсени се над 500 демонстранти, откако безбедносните сили ги разбија протестите на неколку илјади лица во главниот град Анкара.
Масовните протести и нередите во Турција не запираат ниту четврти ден по ред. Протестите започнаа поради незадоволство од одлуката на владата да ги исече 600 дрвја во парк во Истанбул и таму да изгради трговски центар. По насилниот одговор на полицијата, демонстрациите се проширија на сите поголеми градови, а демонстрантите почнаа да бараат оставка од владата на Ердоган.