Продолжува ширењето на морбили во земјава: Регистрирани нови случаи

Добивај вести на Viber

Епидемијата на малите сипаници не стивнува во земјава. Од институтот за јавно здравје информираа дека се регистрирани нови 105 случаи на морбили. Скоро половина, односно 49 од ново заболените се од Скопје, а останатите 56 лица од внатрешноста на земјата. Од институтот потенцираа дека 77,1 отсто од заболените се невакцинирани лица, лица кои примиле само една доза од МРП вакцина, или лица кои немаат податок за вакцинален статус.

Од почетокот на ширењето на заразната болест па се досега се регистрирани вкупно 1.625 пациенти, најголема бројка на заболени од морбили во последните 25 години.

„Досега вкупно 27.000 лица се вакцинирани од почетокот на епидемијата, меѓутоа уште 15.600 лица се подложни на вакцинација, чувствителни на вирусот, а досега не се вакцинирани. Токму затоа, како епидемиолог, апелирам да се продолжи со вакцинацијата“, истакна д-р Жарко Караџовски од Институтот за јавно здравје, член на Комисијата за заразни болести во рамки на Министерството за здравство.

Епидемиолозите апелираат да се вакцинираат граѓаните посебно малите деца, бидејќи нема друг метод на заштита за овој вид на заразна болест освен МРП вакцината.

Здравствените власти во соработка со Министерството за образование неодамна изјавија дека од Септември нема да се примаат деца во образовните институции доколку не се вакцинирани.