Противпожарната скала од 1,7 милиони евра на Шилегов го изгаси пожарот во „Рагуза“ на кровот од катната гаража „26 Јули“.
Објавено во: Македонија 08 Август, 2021
Со интервенција на противпожарната скала, за која опозицијата негодуваше дека е купена за скапоплатени 1,7 милиони евра, беше изгаснат синоќешниот пожар во ресторанот „Рагуза“ кој се наоѓа на кровот од катната гаража „26 Јули“ на улица Мито Хаџивасилев Јасмин во центарот на Скопје.
„Благодарение на брзата интервенција на скопските пожарникари екипирани со новата 45 метарска повеќенаменска противпожарна скала, пожарот што вечерва избувна во ресторанот Рагуза на покривот во катната гаража „26 Јули“ беше изгасен во најбрз можен рок.
Употребата на специјалната противпожарната скала беше клучно за брзо локализирање и ефикасно гаснење на пожарот на висока локација, а со тоа е спречено и негово проширување низ долните катови од катната гаража и предизвикување огромна материјална штета“, информираше Петре Шилегов, градоначалникот на Скопје.
Од Град Скопје претходно рекоа дека се работи за софистицирана опрема со која може да се интервенира на објекти кои имаат повеќе од 5 ката и дека набавката е спроведена низ високо транспарентна постапка на меѓународен тендер кој траеше 6 месеци.
Пожарот подолго време не се смируваше во текот на ноќта и постојано се ширеше. Во катната гаража имаше и возила.