Прв состанок на Северна Македонија со членките на НАТО како полноправна членка
Објавено во: Македонија 02 Април, 2020
Шефот на дипломатијата Никола Димитров денеска ќе
учествува на состанокот на НАТО, на покана на генералниот секретар Јенс
Столтенберг и ова ќе биде прво учество на земјава на едно заседание на
Алијансата како полноправна земја членка на Северноатлантскиот пакт.
Во соопштението се наведува дека по официјалното зачленување на Република Северна Македонија во НАТО на 27 март 2020 година и по свеченоста во Брисел каде беше подигнато македонското знаме пред седиштето на НАТО, денешниот состанок на Димитров е прв работен настан на министерот на кој тој активно ќе учествува во дискусијата по приоритетните прашања и активности на Алијансата
Поради пандемијата на коронавирусот, состанокот ќе се одржи преку видеоконференција, но, Столтенберг, вчера изјави дека на земјава ќе и биде посакано добредојде како триесетта земја членка“.
На состанокот, фокусот ќе биде ставен на неколку теми, пред се на координирање на помошта во борбата против пандемијата со коронавирусот и ќе бидат претставени мерките што НАТО и нејзините членки ќе ги преземат за време на кризата
– Ова е глобална здравствена криза. Нашите мисли се со сите жртви на пандемијата и нивните блиски. Им благдариме на сите оние што се во првите линии – здравствените работници, поддржани со цивилни напори. НАТО има своја улога да помогне во оваа борба со невидливиот непријател, рече Столтенберг.
Учесниците ќе разговараат и за основните операции и мисии на Алијансата, како што се борбата против тероризмот, и мировниот план за Авганистан.