Работници со отказ биле најхрабри во пријавувањето на газдите за неисплатен К-15
Објавено во: Економија 21 Јануари, 2019
Работници кои биле отпуштени или си поднеле отказ на работното место биле најхрабри во пријавувањето на газдите за неисплатен К-15 за 2018-та година, потврди Инспекторатот за труд.
Од Нова година па до денес поднесени се над 300 претставки од вработени, но најголем дел од пријавите се од работници на кои им престанал работниот однос, но го исполнуваат условот да добијат регрес.
„По сите овие претставки сè уште се работи, бидејќи според законските одредби треба да ги предупредиме работодавачите ако не исплатиле К-15 тоа да го направат, па имаат рок за жалба на решението, кое е од 8 до 10 дена и ако тогаш не го испочитуваат им се одредува казна“, вели Злате Стојановски, раководител на сектор за работни односи при Државниот инспекторат за труд.
Имало и поплаки дека некои работници добиле помал износ на К-15 отколку што очекувале, но инспоекторатот не можел да реагира бидејќи се работи за суми во ракмите на законските прописи. Најмногу се од секторите трговија и угостителство, но и од производствени капацитети, а нема ниту една преставка дека газда ја барал сумата да му се врати на рака откако ја исплатил на банкарска сметка.