Рама вели дека Албанија е подготвена да ја чека Македонија на патот кон ЕУ

Добивај вести на Viber

Соседна Албанија е подготвена да ја чека Македонија на патот кон ЕУ. 

Идентитетските прашања не треба да бидат дел од дневната политика, вели албанскиот премиер Еди Рама. 

Рама денеска на прес-конференција во Брисел изјави дека идентитетските прашања не треба да бидат дел од дневната политика и дека Албанија е подготвена „да ја чека Северна Македонија“ за да не се одвојат двете држави во процесот на интеграција, јави дописничката на МИА од Брисел. Рама ја потенцира својата поддршка за земјава и изрази надеж дека лидерите во Скопје и Софија „ќе покажат мудрост и ќе го надминат спорот“. Тој вели дека кога дознал дека идентитетските прашања се покренати во процесот на преговори за Северна Македонија, тој бил „ужаснат“.

„Минатото е процес кој може да ја зароби Северна Македонија, не дај Боже, за којзнае колку време, но ако треба да ве чекаме и да бидеме трпеливи, ќе ве чекаме како наши соседи и ќе трпиме“, изјави Рама.

Редовниот состанок за стабилизација и асоцијација со Северна Македонија, кој требаше да се одржи на крајот на февруари, беше одложен, но според еврокомесарот Вархеји, тоа нема никаква поврзаност со некаков притисок од Бугарија. Бугарија дава поддршка за Албанија, но не и за Македонија. 

Бугарскиот вицепремиер и министер за одбрана, Красимир Каракачанов неодамна изјави дека во следните месеци кога во Софија повторно ќе се отвори прашањето за влез на Македонија и Албанија во Унијата, има голема можност тој да предложи двете земји да бидат одвоени. 

Со тоа Албанија може да продолжи напред кон европскиот пат. За Македонија пак европската врата според Каракачанов може да се отвори само ако се прифатат бугарските толкувања на историјата. 

Екс премиерот Љупчо Георгиевски деновиве даде предлози за тоа како да се надмине спорот, по што имаше остри реакции.