Рама за МТВ2: Со Италија сме тесно поврзани, со Македонија нема да има размена на доктори
Објавено во: Македонија 30 Март, 2020
Албанскиот премиер Еди Рама во изјава за вториот канал на македонската државна телевизија рече дека Албанија испратила 30 медицински сестри и доктори во Италија затоа што двете земји, како што вели тој, се историски тесно поврзани.
„Јас објаснив и повторив дека за нас тоа беше природен и неопходен чин бидејќи Италија е и наш дом, дом на многу Албанци, и на некој начин на сите Албанци затоа што ние историски сме тесно поврзани со Италија“, рече Рама.
Тој додаде дека каква било соработка со државите во регионот, вклучително и Македонија, за размена на медицински персонал не е планирана.
„Нашите министри за здравство се во постојана комуникација, тие разменуваат информации, мислења, но повеќе од тоа не можеме да направиме и не гледам што би можеле да направат другите“, вели Рама.