Ременски тврди дека е валкана игра: Продолжува судењето за Меѓународен сојуз
Објавено во: Македонија 21 Јули, 2020
Поранешната пратеничка и министерка Фросина Ременски сподели пред дваесетина минути на фејсбук нејзино интервју во кое вели дека ги знае сите актери на валканата конструкција против неа. Таа денеска е на судско рочиште. Во судот продолжува, по одложувањето на 1 јули, процесот за организацијата Меѓународен сојуз. Основана е од Бојан Јовановски - Боки 13 кој беше првообвинет и осуден во случајот Рекет.
Во овој случај освен Ременски и Јовановски осомничени се и татко му Миле Јовановски и Јасна Мандиќ.
Ременски која е и поранешна потпретседателка на СДСМ е обвинета за помагање во делото измама, Мандиќ за помагање во измамата и перењето пари. Миле Јовановски се терети за помагање во перењето пари и за неовластено изработување, држење, посредување и тргување со оружје.
При претрес во неговиот дом биле пронајдени три полуавтоматски пиштоли и муниција за кои немал дозвола. Како правно лице обвинета е и невладината организација.