„Репортери без граници“: Македонија најлошо котира во регионот
Објавено во: Македонија 26 Април, 2017
Македонија е најниско рангирана од сите држави во регионот во годинешниот извештај изработен од „Репортери без граници“ за слободата на медиумите во светот.
Извештајот е објавен денеска. Земјава годинава е на 111 место, за разлика од лани кога беше на 118 место, и е во групата земји чија медиумска ситуација е тешка. Поголемиот дел од земјите во регионот се во групата со забележливи проблеми. Најдобра е состојбата во Босна и Херцеговина која е на 65 место, Србија е едно место подолу, Хрватска е на 74, Косово на 82, а Црна Гора е рангирана на 106 место. Што се однесува до светот, 21 земја се на „црна листа“ во која, меѓу другите се Египет и Северна Кореа. Најслободна за работа на медиумите е Норвешка, а зад неа следат Шведска, Финска и Данска.
Картата на светот, изработена од „Репортери без граници“ е обележана целосно со црвена боја, што означува дека ситуацијата со слободата на медиумите е многу сериозна. САД паднаа за две места до 43. место, и Велика Британија исто така за две - до 40 место.