Роднините на убиениот работник од Македонија во Кабул ја чекаат потврдата од МНР, но од таму никако да стигне
Објавено во: Македонија 04 Август, 2018
Илија Мерџановски од Љубанци е убиениот триесет и седум годишен Македонец во Авганистан. Официјална потврда од Министерството за надворешни работи се уште нема, велат дека поради сериозноста на случајот не можат да коментираат се додека од тамошните институции не добијат официјална информација по нивното барање.
Роднините велат дека уште потешко е тоа што нема уште официјалната потврда и транспортирањето на телото не знаат кога ќе пристигне во Македонија.
Светските медиуми пренесуваат информација од авганистанското МВР дека станува збор за терористички акт, а се сомневаат и дека возачот на автомобилот е вмешан во тројното убиство. Киднапирани со врзани раце, а потоа стрелани во глава. Нивните лични документи биле пронајдени покрај нивните тела.
Покрај Илија Мерџановски, ликвидирани се уште двајца – 39 годишен Индиец и 64 годишен Малезиец кои биле негови колеги во „Содексо“, компанијата за кетеринг..
Кабул е главниот град на Авганистан каде што има многу странски државјани кои се на печалба како кувари, водоводџии, електричари. Имаат високи плати, но голем ризик по живот. На мета на милитантните групи се токму странците, кои често ги киднапираат и за нивниот живот бараат скап откуп.