Русија денеска прва во светот ја регистрираше вакцината против коронавирусот, Путин ја објави веста
Објавено во: Свет 11 Август, 2020
Русија прва во светот денеска регистрираше вакцина против коронавирусот, објави претседателот Владимир Путин на состанокот со владата.
„Колку што знам, утрово е регистрирана првата вакцина против епидемијата со коронавирус. Знам дека делува доста ефикасно, формира стабилен имунитет и, повторувам, ги помина сите потребни тестови“, рече шефот на државата.
Тој исто така изјави дека една од неговите ќерки била вакцинирана против Ковид-19.
„Во одредена смисла, таа учествуваше во експериментот. По првото вакцинирање, нејзината температура беше 38, следниот ден - 37 и тоа е сè“, рече Путин.
Претседателот истакна дека „многу луѓе воопшто немаат никакви надворешни манифестации“ или температура по имунизацијата.
Директор на Институтот за истражување на епидемиологија и микробиологија,, професор Александар Гинтсбург, ја прогласи вакцината за успешна.и им честиташе на научниците.
"Се надевам дека ќе успееме да започнеме во блиска иднина со масовно производство на оваа вакцина. Со цел сите што сакаат, исклучиво доброволно, да ги искористат достигнувањата на нашите специјалисти “, рече тој.
Планирано е да се произведува на две локации - во самиот Институт и во компанијата „Бинофарм“, најави министерот за здравство Михаил Мурашко.
Предклиничките студии беа спроведени од страна на Националниот центар за епидемиологија и микробиологија и на истражувачкиот институт на Министерството за одбрана, а клинички студии беа спроведени на Институтот Сеченов и филијалата на Главната воена болница Бурденко.
Испитувањата во кои учествуваат илјадници луѓе ќе продолжат, додаде Мурашко, а имунитетот би требало да трае две години.
Според податоците на државниот регистар на лекови на Министерството за здравство, руската вакцина ќе биде во промет на 1 јануари 2021 година.