Русија се закани на САД дека ќе има огромни последици ако Америка ја нападне Сирија
Објавено во: Свет 10 Април, 2018
Русија и САД со меѓусебни остри закани во ОН кога рускиот претставник го предупреди Вашингтон на „негативни последици“ доколку ја нападне Сирија, а американската амбасадорка возврати дека рацете на Москва се извалкани „со крвта на сириските деца“.
Итната седница на Советот за безбедност беше свикана поради наводниот хемиски напад врз бунтовничкиот град Дума минатиот викенд во кој загинаа најмалку 40 луѓе.
Западните сили за нападот ја обвинуваат сириската влада и нејзините сојузници Русија и Иран кои негираат дека нападот воопшто се случил.
„Немаше никаков хемиски напад“, кажа рускиот амбасадор Василиј Небензја.
„Низ одредени комуникациски канали веќе им пренесовме на САД дека употребата на воена сила, под лажен изговор, против Сирија каде на барање на легитимната сириска влада се распоредени руски војници, би можела да доведе до несогледиви последици“, истакна тој.
Небензја додаде дека инспектори на агенцијата на ОН за хемиско оружје би требало да заминат во Сирија каде им понуди заштира на руската војска и сириските власти.
Американската амбасадорка Ники Хејли истакна дека САД „ќе одговорат“ на смртоносниот хемиски напад во Сирија, без оглед на тоа дали Советот за безбедност ќе реагира или не.
„Дојдовме до точката во која светот мора да види дека правдата е задоволена“, истакна таа.
„Овој момент ќе остане запамтен во историјата како моментот кога Советот за безбедност или ја исполнил својата должност или покажал немоќ и не го заштитил сирискиот народ. Во секој случај, САД ќе одговорат“, истакна Хејли.