Рускиот војник Вадим Шишимарин осуден на доживотен затвор поради воено злосторство во Украина
Објавено во: Свет 23 Мај, 2022
Судот во Украина пресуди доживотен затвор за рускиот командант на тенк за убиство на цивил на првото судење за воени злосторства по инвазијата.
Заробениот војник, Вадим Шишимарин беше осуден за убиство на Олександр Шелипов (62) во североисточното село Чупахивка на 28 февруари.
Тој призна дека пукал во г-дин Шелипов, но рече дека дејствувал по наредба и побарал прошка од неговата вдовица.
Повеќе други наводни воени злосторства се истражуваат од Украина.
Москва негираше дека нејзините војници биле насочени кон цивили за време на инвазијата, додека Украина вели дека можеби се случиле повеќе од 11.000 злосторства.
Ова судење во украинскиот главен град Киев се смета за шанса на Украина да докаже, без сомнение, дека руски војник убил цивил без да ги почитува правилата на војната, пишува Би-Би-Си.
Пред пресудата, адвокатот на одбраната на Шишимарин - назначен од државата – изјави дека ниту еден руски функционер не бил во контакт со него. Портпаролот на претседателот Владимир Путин рече дека Кремљ „нема информации“ за овој случај.
Во моментот на убиството Шишимарин (21) и други војници патувале со автомобил што го заплениле откако нивниот конвој бил нападнат и тие се одвоиле од нивната единица.
Неговиот бранител изјави пред судот во петокот дека Шишимарин пукал откако двапати одбил да ја изврши наредбата да пука и дека само еден од три до четири куршуми ја погодил целта. Тој рече дека Шишимарин испукал куршуми од страв за сопствената безбедност.
Во еден драматичен момент за време на судењето, вдовицата на жртвата Катерина Шелипова се соочи со Шишимарин. „Кажи ми, те молам, зошто вие [Русите] дојдовте овде? да не заштитите? праша таа, наведувајќи го оправдувањето на рускиот претседател Владимир Путин за инвазијата на Украина.