РУСКОСКА: Ќе изнесеме цврсти докази за алчноста на Јанева и за Кичеец кој не ја заборави торбата со пари
Објавено во: Македонија 03 Декември, 2019
Не шедеше зборови со кои ќе им се обраќа на тројцата обвинети во „Рекет“, јавната обвинителка Вилма Рускоска.
Во воведниот говор на ова прво судско рочиште рече дека во случајот не се жртви оние на кои им се барале пари, туку дека жртви се сите граѓани на Македонија.
-Обвинителството ќе изнесе цврсти докази за алчноста на Катица Јанева која ја издаде довербата на народот помагајќи му на Бојан Јовановски со изнесувањето материјали од предистражни постапки кои се службена тајна за да може Боки 13 од обвинетите во тие постапки да бара милионски пари за тие постапки да завршат со спогодба или во најдобар случај како сведоци. Ќе докажеме дека свесно ја злоупотребила службената положба а можеби и ќе слушнете дека Камчеви први побарале и молеле за помош, но не е така-истакна обвинителката Рускоска.
Таа потенцираше дека ОЈО ќе изенесе и докази дека Боки 13 преку Кичеец први стапиле во контакт со Ана Камчева а кажа и дека од „обвинетиот Кичеец може ќе слушнете дека се што направил било да му помогне на Камчев зошто го чувствувал како брат, но ќе видите и дека не заборавил да ја земе торбата полна пари“.
Претходно, Катица Јанева и Бојан Јовановски кажаа дека не чувствуваат ниту трошка вина за овој случај. Боки13 отиде до таму што рече дека и до последната капка крв ќе стои во судницата. Зоран Милески Кичеец го призна делото.
„Не се чувствувам добро и едвај стојам, жалам што тоа денес е така, но ќе кажам дека не чувствувам вина ниту за кривичното дело примање награда за противзаконито влијание, ниту за перење пари“, рече Јовановски пред судот откако беше одлучено да почне судењето за „Рекет“, а лекарите утврдија дека тој може да го следи судењето но бидјеќи беше под стрес доби диазепам.