САД И ГЕРМАНИЈА СЕ ВЕТЕНИ ЗЕМЈИ: Повеќе од половина од населението би заминале

Добивај вести на Viber

Голема е желбата за заминување од Албанија. 

Повеќе од половина од граѓаните на оваа земја сакаат да заминат во некоја побогата држава каде ќе имаат подобар живот. 

Ова се наведува во студија изработена од професорот Расел Кинг од Универзитетот во Сасекс и албанскиот истражувач, Илир Гедеши.

Студијата открива дека потенцијалната миграција на земјата се зголемила од 44 проценти во 2007 година на 52 проценти во 2018 година.

„По падот на комунизмот во Албанија, во 1991 година, повеќе од 1,4 милиони Албанци, речиси половина од сегашната популација во земјата, емигрирале, главно во Италија и Грција, а помалку во Велика Британија, Германија и САД“, стои во студијата.

Во неа стои дека економските мотиви се главниот фактор на миграцијата, но за разлика од порано, Албанците сега претпочитаат да заминат во Германија и САД, а не во соседните земји.

Поради економската криза од 2008 година, која ги погоди економиите на Италија и Грција, 133.544 албански емигранти беа принуди да се вратат во Албанија. Но, истите продолжиле да бараат излез. 

Според пописот спроведен во  2011 година, Албанија има 2.891.977  жители. Од вкупната попишана популација, со постојано место на живеење во Албанија се 1.421.810 жители, додека другите престојуваат во странство до една година.

Ако споредиме со податоците од пописот во 2001 година, бројот на вкупната популација е помал за 7,7 отсто, како резултат на емиграцијата и намалениот наталитет. Се предвидува дека до 2025 година населението во Албанија би можело да се сведе под еден милион.