САД по обвинението против Тачи: Чекор напред кон правдата за жртвите на Косово

Добивај вести на Viber

Откако беше поднесено обвинение против косовскиот претседател, поранешниот лидер на ОВК, Хашим Тачи, се огласи и Стејт департментот, за кого ваквиот потег на Специјалниот суд во Хаг е „уште еден чекор кон правдата за жртвите на Косово“.

Портпаролот на Стејт департментот рече дека САД го сметаат поднесувањето на обвинението за воени злосторства против Тачи и девет други, објавено од Кабинетот на независното специјализирано обвинителство, чекор кон правдата и процесот на помирување во Западен Балкан.

Од таму ги повикаа Специјализираниот совет на Косово и независната канцеларија на Специјалното обвинителство да се придржуваат кон нивниот мандат, додека случајот напредува низ судскиот систем, и оценија дека зад оваа објава е процес кој трае 20 години, пренесува „Гласот на Америка“.

„Овој чекор е неопходен за унапредување на владеењето на правото и за правда за жртвите во Косово и земјата да се оддалечи од овој ужасен период и да се приклучи на евроатлантската заедница“, се заклучува во соопштението.

Специјалното обвинителство во Хаг поднело обвинение од десет точки до Специјализираните комори на Косово за распит против Хашим Тачи, Кадри Весели и други, „обвинети за злосторства против човештвото и воени злосторства, вклучително и убиства, присилно исчезнување, прогон и тортура“.

Во обвинението се тврди дека Тачи, Весели и други осомничени во обвинението се кривично одговорни за скоро 100 убиства.