САКА ДА УЖИВА ВО ПЕНЗИОНЕРСКИТЕ ДЕНОВИ - Меркел ја одби понудата на Гутиереш да работи во ОН
Објавено во: Свет 19 Јануари, 2022
Поранешната германска канцеларка Ангела Меркел ја одбила понудата на генералниот секретар на ОН Антонио Гутереш да работи во светската организација.
Според германските медиуми, од кабинетот на Меркел соопштиле дека таа минатата недела телефонски разговарала со Гутереш и му се заблагодарила за понудата, но и дека не може да ја прифати.
Според медиумите, понудената работа би била интересна за неа, бидејќи суверено „владеела“ со меѓународната политичка сцена и се уште има голема репутација, но таа ја одбила работата бидејќи сака да ужива во пензионерските денови.
Медиумите потсетуваат дека Меркел при последното патување во Вашингтон најавила дека нема да брза да презема нови задачи. Генералниот секретар на ОН и понуди на Меркел да биде дел од високиот советодавен тим во светската организација.
Според германските медиуми, агенцијата ДПА, повикувајќи се на дипломатски извори во ОН, на Меркел и понудиле претседателство во телото за глобални јавни добра, од што потенцијално би требало да имаат корист сите граѓани на светот. Гутереш преку писмо ја испратил понуда до Меркел. Телото за глобални јавни добра е проект на Гутереш кој е дел од реформите на ОН.
Во својот извештај за реформите на ОН минатата година, тој најави дека ќе ги повика поранешните шефови на држави и влади да воспостават глобална листа на јавни добра и други области од заеднички интерес каде што треба да се подобри управувањето.