Сами не можат, па бараат агенција: Собраниски тендери за патувањата и сместувањата на спикерот и пратениците
Објавено во: Македонија 18 Март, 2019
Собранието распиша тендер за Aнгажирање на агенција за сместување во земјата и странство. Законодавниот дом бара агенција која ќе ги сместува пратениците и спикерот во хотели кога ќе патуваат во земјава и надвор, а имајќи предвид дека е отворен процесот за евтоатлантските интеграции на земјава тие имаат набиени агенди.
Покрај тендерот за агенција за хотелско сместување, Собранието распиша и тендер за авиобилети.
Според тендерот проценета вредност на договорот без ДДВ е 13.000.000 денари или околу 211.000 евра а тој за авиобилети има проценета вредност на договорот без ДДВ е 13.000.000 денари.
Од Собранието за медиумите велат дека имаат проблем кога пратениците одат на пат да обезбедат хотели а тврдат и дека агенциските провизии не се големи.
„До сега тоа го правеа повеќе собраниските служби, во зависност која делегација патува. Собираа понуди од агенции и се одбираше најповолната.Сега планот е тоа да го прави посебна Агенција која треба да понуди најниски понуда за хотели. Тоа е проценета сума, не значи дека цела ќе ја потрошиме, но во планот за јавни набавки е проектирана врз база на тоа колку се трошело претходните години“ – рекла генералната секретарка на Собранието Цветанка Иванова за ТВ24.
Критериуми за доделување на договорите е најниската понуда.
Таа агенција ќе има задача на Собранието да му понуди минимум хотели со три ѕезди кои се оддалечени до километар од местото каде што се одржува настанот.