Само 23 пријавени случаи на семејно насилство во 2020 година: Проблемот е во недовербата во институциите предупредува Хелсиншкиот Комитет
Објавено во: Македонија 25 Ноември, 2020
Во 2020 година, Хелсиншкиот
комитет регистрира 23 случаи на семејно и родово базирано насилство, за кои
била обезбедена бесплатна правна помош.
Во споредба со претходните години, ова не укажува на постоење тренд на пораст на пријавите, што неминовно повторно упатува на ниското ниво на доверба во постапувањето на институциите по ова прашање. И оваа година не изостанаа случаите на фемицид, односно убиствата на жена затоа што е жена. Со последниот случај на фемицидот во Гостивар се потврди дека најчестата причина поради која физичкото насилство резултира во убиство е несериозниот пристап на институциите кон родово базираното насилство. Несоодветното постапување по пријавите очекувано ја потхранува недовербата. Исто така, фемицидот сè уште не е препознаен во нашето законодавство како посебно кривично дело и покрај тоа што тоа претставува најтешка форма на насилство врз жената и е една од водечките причини за прерана смрт кај жените на глобално ниво, истакнуваат од ХК.
По повод 16 дена активизам против родово базирано насилство, што започнува токму денеска на 25. ноември, Вила Водно беше обоена во портокалова боја, а претседателот Стево Пендаровски во видео порака истакна дека против насилството треба да се бориме секој ден.
-Сè поголемиот број на жени и деца, жртви на семејно и родово базирано насилство во текот на пандемијата, е последниот сигнал дека е потребен побрз одговор од институциите, сеопфатна стратегија и поддршка на жртвите на насилство.Истовремено, должни сме како луѓе, насилството да го пријавиме и да им помогнеме на жртвите. И не само денеска, на Меѓународниот ден за борба против насилство врз жените и девојчињата и родово базирано насилство или во следните 16 дена активизам. Против насилството заеднички треба да се бориме секој ден, вели во видео обраќањето претседателот Пендаровски.