СДСМ го прифаќа предлогот на Дескоска за откажување од буџетските пари
Објавено во: Македонија 25 Март, 2020
Лидерот на СДСМ, Зоран Заев, одговарајќи на новинарско прашање денеска рече дека владеачката партија е подготвена да се откаже од буџетските пари кои и следуваат оваа година и да го прифати предлогот на министерката за правда Рената Дескоска.
Заев рече дека не сака да коментира за другите партии дали да го прифатат овој повик, но рече дека може да ги повика да го направат тоа.
- Парите не треба да доаѓаат кај партиите сега. Треба да се зголемува приватната и јавната потрошувачка. Драго ми е што СДСМ има капацитет да се откаже од тие пари, рече претседателот на СДСМ на денешната прес конференција.
Повтори дека, согласно даноците кои се уплаќаат во државната каса, буџетот ќе биде намален на само една третина од планираното и ќе бидат потребни задолжувања.
- Големите пари ги повлекоа големите земји. Малку се парите кои ни се нудат како кредити. Дел ќе биде со кредити, но дел ќе мора сите заедно да се жртвуваме. Мораме да имаме рамномерна распределба на товарот. Наплатата на државните приходи е помеѓу 30 и 40 проценти. Недостасуваат 60 отсто. Буџет наместо од 4 милијарди, вака ќе имаме само 1,4 милијарди евра, напомена Заев.