СДСМ: Оние кои вчера покажаа насилство во Собранието ќе понесат одговорност
Објавено во: Македонија 28 Април, 2017
„Демократските процеси продолжуваат, по легитимниот избор на нов претседател на Собранието на Република Македонија.
Никој не може да ја спречи вербата и волјата на граѓаните на Македонија за живот, правда и придружување на Македонија кон цивилизираниот свет, преку евро-атланските перспективи“, соопштуваат утринава од кабинетот на СДСМ.
Оттаму потсетуваат дека домашната и меѓународната јавност гласно ја поддржаа деблокадата на Парламентот и „пратија јасна порака дека крајот на режимот доаѓа и мора да се повлече пред мнозинската волја на над 700.000 граѓани претставени преку 67 пратеници во Собранието кои сакаат да живеат во демократска Македонија.
Од СДСМ ги повикаа институциите да ги преземат сите потребни мерки да ги заштитат државните и граѓанските интереси а оние кои ги загрозиле животите на граѓаните во Собранието, и оние кои учествуваа во вечерашното насилство во Парламентот ќе понесат одговорност.
Од партијата на Заев апелираат до граѓаните да останат смирени бидејќи е направен огромен исчекор напред во демократските процеси на Македонија, а во периодот што престои, велат, процесите ќе продолжат со конечно реализирање на мнозинската волја на граѓаните.