СДСМ ПРАВИ „ПОПИС“ НА СВОЕТО ЧЛЕНСТВО - дури 1.563 тимови ќе одат по домови да ажурираат

Добивај вести на Viber

Дури 1.563 тимови се ангажирани од најголемагта владејачка партија за ажурирање на членството. 

Според потпретседателот на партијата Оливер Спасовски, процесот финишира на 21 март со првите внатрепартиски избори за претседател на СДСМ.

„Со промените на Статуот за прв пат, за да покажеме на дело и да направиме чекор напред во демократизацијата ќе избираме претседател на СДСМ на непосредни избори. Затоа е потребно да се изврши ажурирање на членовите на СДСМ и токму денеска во Охрид во партиските простории сум тука да разговараме во однос на процесот за ажурирање на членството. Во моментот имаме 1.563 тимови на територијата на земјата коишто работат во 74 општински организации коишто ќе ги посетат домовите на нашите членови по сите стандарди и по сите здравствени протоколи во оваа ковид криза“, рече Спасовски.

Тој кажа дека денеска на таа тема разговарале и во општинската организација на СДСМ во Охрид каде во тек е реевиденција на членови на партијата.

„Затоа ги повикувам сите членови на СДСМ во Охрид да пристапат кон ажурирање на своето членство, да ја добијат својата електронска картичка за членство, а воедно остануваме отворени и за секој еден којшто сака да пристапи кон Социјалдемократскиот сојуз, да пристапи кон овие наши идеи, којшто споделува заеднички ставови за иднината на нашата држава, исто така што може да го направи во целиот овој период и по ажурирањето очекуваме дека на 21 март членовите ќе гласаат за избор на новиот претседател на Социјалдемократскиот сојуз на Македонија“, рече Спасовски.