СДСМ: Со внесувањето на Драги Ковачки во Извршниот комитет, Мицкоски ја милитаризира ВМРО-ДПМНЕ

Добивај вести на Viber

Социјалдемократскиот сојуз денеска преку прес конференција реагира на, како што ја нарекуваат, милитаризацијата на ВМРО-ДПМНЕ, со внесувањето на полковникот Драган Ковачки за член на Извршниот комитет. 

„Во ВМРО-ДПМНЕ ништо не е променето. Со изборот на новите членови на Извршниот комитет, Мицкоски ја потврди режимската криминалната матрица на оваа партија, уште уредувана од Никола Груевски. Наместо демократизација, извршителот Мицкоски спроведува милитаризација на ВМРО-ДПМНЕ, со цел што подолго да ја задржи својата партиска фотеља во белиот дворец“, изјави на прес Коста Костадинов, портпарол на СДСМ. 

Внесувањето на Драги Ковачки, полковник на Армијата за член на Извршниот комитет, според него, е неетички и недемократски преседан. 

„Дополнително, ова е обид да се наштети на високиот углед кој го има, гради и чува Армијата. Како земја членка на НАТО Алијансата и пријател со демократскиот свет не смее да има место за политика и за партизација во редовите на АРМ. Припадниците на Армијата се на сите граѓани, треба да ја штитат државата и граѓаните. Во демократски општества нивното место со сигурност не е во партиите. Како по примерот во некоја земји од Латинска Америка каде воени лица парадираат во дворците на партиски високи позиции. Тоа се случува само во режими од Латинска Америка и Африка. Ова не постои во ниедна демократска држава и партија. Ова покажува колку е очаен Христиан Мицкоски. Со него и Груевски ВМРО-ДПМНЕ е деструктивна и недемократска партија“, рече Костадинов.