СДСМ: Терминалот во Александропули започнува со работа, направивме визионерски потег

Добивај вести на Viber

СДСМ соопшти дека претходно како владеачка партија направиле визионерски потег со учеството во изградбата на терминалот за ЛНГ во грчкиот Александропули, кој започнува со работа на 1 октомври и со тоа Македонија, како што велат од таму, годишно ќе има обезбеден неруски гас од 500 милиони метри кубни.

„На 1 октомври 2024 година ќе биде пуштен во употреба терминалот за течен природен гас (ЛНГ) во Александропули, проект во кој претходната Влада предводена од СДСМ, визионерски учествуваше од самиот почеток.

Со овој проект, државата ќе обезбедува 500 милиони кубни метри гас годишно, што ја надминува годишната потрошувачка од 400 милиони кубни метри. Македонија ќе обезбедува повеќе од доволно за да ги задоволи домашните потреби и ќе може да се пласира гас и во соседните земји, како Србија и Косово. Овој проект ќе ѝ обезбеди можност на државата за дополнителни приходи преку извоз на гас во регионот.

Покрај ова, оваа енергетска инфраструктура ја зајакнува енергетска независност и придонесува за зголемена енергетска сигурност на нашите граѓани и економија.

Покрај обезбедувањето на неруски гас, проектот вклучува и изградба на енергетска централа со капацитет од 800 мегавати, која ќе биде завршена во 2024 година“,соопшти СДСМ:

Од опозициската партија додаваат дека ВМРО-ДПМНЕ била против овој проект кога се носела одлуката за учество во финансирањето на проектот и дека денеска се покажува дека СДСМ била во право.

„СДСМ е горда на својата улога во обезбедувањето на енергетската иднина на земјата и на значајниот придонес кој го направи за енергетската безбедност и економскиот развој на Северна Македонија. Ова е уште еден доказ дека нашата партија секогаш работи во интерес на граѓаните и на долгорочната иднина на нашата земја“, коментираат од таму.