Се фрла храна која може да се даде на сиромашните

Добивај вести на Viber

Наместо да се фрла, храната во Македонија може да се даде на сиромашните семејства. 

Во земјава се фрла речиси една четвртина од вкупното количество храна со која располагаат маркетите, рестораните, производителите и дистрибутерите. Најмногу храна фрлаат дистрибутивните ланци чии производи се со краток рок на траење, потоа следат рестораните и домаќинствата.

Ова го покажува истражувањето спроведено во рамки на проектот „Храната за гладните, а не на депонија“ што беше презентирано денеска. Вкупно 99% од испитаниците одговориле дека сакаат да ја донираат храната, а 45% од отпадот од домаќинствата е органски според истото истражување. 

Банката за храна пред пет години покренала иницијатива за донесување закон за нефрлање храна во земјава, но не добила одговор од надлежните. По изборите пак ќе има ваква иницијатива. 

„Илјадници тони храна која е добра за консумирање, секоја година завршува на депонија. Овошје и зеленчук што стоеле неколку денови, но не се расипани, млеко и месо со нивните преработки кои се пред истекот на рокот, леб, печива, слатки и друга пакувана храна секојдневно се исфрлаат од македонските маркети и ресторани“ - вели Душко Христов од Банката за храна. 

Истражувањето е направено во Тетово, Скопје, Битола и Струмица изминатите неколку месеци од  „Храна за сите - Банка за храна Македонија“.

Македонија се наоѓа меѓу седмото и осмото место по фрлање храна во светот гледано според бројот на жители. САД најмногу фрлаат храна во глобални рамки.