Се јави инвеститор кој ќе вложи 186 милиони евра во Попова Шапка, „Фактор“ го објави пред половина година
Објавено во: Економија 25 Ноември, 2022
Министерот за животна средина, Насер Нуредини, денеска објави дека австриската компанија ТехноАлпин сака да инвестира во ски-центарот Попова Шапка, а за тоа на денешната владина седница предлог проектот за стратешка инвестиција доби зелено светло.
Вкупната инвестиција е околу 186 милиони евра и опфаќа реновирање на постоечки објекти, поставување систем за вештачки снег, проширување на постојниот скијачки простор со нови објекти и патеки, реновирање и проширување на хотели, изградба на нови хотелски капацитети, изградба на асфалтен паркинг. парцели, велосипедски патеки и создавање на нови рекреативни активности, кои ќе овозможат овој центар да се вброи во најсовремените европски зимски центри. Инвестицијата треба да се реализира од 2023 година и ќе се одвива во 6 инвестициски фази, од кои првата е проценета на приближно 55 милиони евра.
„Фактор“ ја објави инвестицијата пред половина година, откако изминатиот период австриската ТехноАлпин, најпознатата компанија за инсталирање на системи за производство на вештачки снег во Европа, регистрираше своја компанија во Македонија под името МТГМ Индустрија со седиште на Попова Шапка.- Сега веќе можеме да ја споделиме информацијата дека добивме сериозна понуда од страна на реномираната европска компанија од Јужен Тирол, ТехноАлпин којашто е светски лидер во производство и инсталирање на системи за вештачки снег, признат експерт за дизајн на скијачки терени и скијачки зони и со 30 годишно искуство, 16 зависни друштва низ светот и 600 вработени. Оваа компанија, по направеното истражување, понуди амбициозен план за развој, иновации и раст на ски-центарот Попова Шапка кој се карактеризира со модернизација на постоечката ски зона и нејзино територијално проширување, подобрување на примарната инфраструктура неоходна за развој на областа, со квантитативни и квалитативно подобрување на туристичко сместувачката дејност, со вклучување на нови капацитети за прилагодување на туристичката понуда на актуелните барања на туристичкиот пазар и проширување на истата„објави Нуредини.