Се надѕира ли светло на крајот од грчко-македонскиот тунел?

Добивај вести на Viber

Нови напори во решавање на прашањето за името на Македонија.

Македонија и Грција ќе формираат работни групи, предводени од министрите за надворешни работи, како би разговарале за тој спор. А новата рунда преговори со посредникот на ОН би требало да биде на 17 јануари во Њујорк. Кои се опциите и дали е можен и каков е патот до компромис.

Прашањето кое корените ги влече од 19 век, а 25 години траат проблемите со името, би можело да добие одговор во наредните месеци.

„Го охрабривме медијаторот да излезе од почетната рамка и ние на ниво на министри брзо по добивањето на тоа, ќе преговараме, ќе формираме преговарачки тимови. Важно е само со колегата Никос и министерот Коѕијас дека се разделивме со уерение дека има волја на двете страни“, истакна министерот Никола Димитров.

Грчкиот премиер Алексис Ципрас порачува дека прозорот за решавање на ова прашање е отворен, доколку се покаже дека ставовите на македонскиот сосед се искрени.

До решение, се шпекулира за можни имиња со географска одредница-Горна, Вардарска, но и Нова Македонија.

Сепак согласност за промена на името владата ќе мора да побара од граѓаните на референдум. За уставните измени, ќе биде потребна двотретинска поддршка, т.е. поддршка и од опозицијата.

А решението, според премиерот би можело да се најде во првите шест месеци во годината. За тоа време, Бугарија која претседава со Унијата, иако не призна под уставното име, ќе не нарекува Поранешна Југословенска Република Македонија.