Се најде ли купувач на кумановската фабрика на Салептас
Објавено во: Економија 11 Декември, 2018
Доверителите на ДС Искра Констракшн се надеваат на продажба на стечајниот должник кој работи во индустриската зона во Куманово на државно земјиште. Собранието на доверители на 24 декември треба да ја потврди продажбата на градежната фирма за челични конструкции понудена за сума од 504 милиони денари во сопственост на стечајниот должник, грчкиот инвеститор Димитриос Салептас.
Во пакетот влегува фабрички комплекс и објекти со вкупна површина од 26.947, метри квадратни, машини, опрема, транспортни средства и останат движен имот. Собранието на доверители ќе донесе одлука дали имотот ќе биде продаден по постигнатата највисока цена на електронската продажба со јавно наддавање.
Салептас, основач на неколку фирми во индустриската зона во Куманово е странски инвеститор од 2005-та наваму и основач и на фирмите ДС Искра Констракшн, ДС Фудс, Одисеас. Во 2005-та Салептас за околу 680 илјади евра ја купува кумановска Искра.
За прв пат во 2015 година се испитуваат условите за отворање стечајна постапка над должникот, а во 2017-та кумановскиот суд објавува дека се усвојува предлогот на кредитниот доверител Стопанска банка АД Скопје да се отвори стечајна постапка. Првото испитно рочиште беше на самиот почеток од годинава.
Покрај на кредиторот и работниците, ДС Искра Констрашн е должник и на УЈП, а пред 12 години дирмата била сопственик на парично поба-рување по основ на склучен договор со DIEKAT CONSTRUCT SA од Bucharest во износ од 2.175.000 ЕВРА. Последниот кредит ДС Искра Констракшн од домашен доверител го бара во 2010 година.
Огласот за продажба на речиси целокупниот имот беше објавен во февруари годинава, со тоа што земјиштето не беше предмет на продажба бидејќи е во сопственост на државата. Рокот за пријавување беше до јули за кога беше закажана електронската аукција.
А.К.