Се однесувал несоодветно: Македонија прогласи руски дипломат за персона нон грата
Објавено во: Македонија 18 Мај, 2021
Дипломат од амбасадата на Русија во Скопје е прогласен за непожелна личност и треба да ја напушти Македонија за седум дена, информира Министерството за надворешни работи.
„Министерството за надворешни работи, согласно член 9 од Виенската конвенција за дипломатски односи, одлучи да прогласи еден дипломат на Амбасадата на Руската Федерација за непожелна личност во Република Северна Македонија. Во оваа насока, на 14 мај 2021 година, во просториите на Министерството за надворешни работи беше повикан Амбасадорот на Руската федерација, при што беше врачена нота со која се наложува на посочениот дипломат да ја напушти територијата на Северна Македонија во рок од седум дена, информираат од МНР.
Попладнето на 14 мај 2021 година, рускиот амбасадор во Северна Македонија, Сергеј Александровиќ Баздикин, бил повикан во Министерството за надворешни работи, каде што бил известен дека еден руски дипломат е прогласен за персона нон грата и дека за неколку часа треба да ја напушти земјата, пренесе претходно „Алмакос“. Во овој текст како причина за протерување на дипломатот се посочуваат активности што не се во согласност со однесувањето кое се очекува од странски дипломат што служи во земјата домаќин.