Се огласија политичари кои се против промена на полот на државна сметка
Објавено во: Македонија 27 Јуни, 2019
Лидерот на ВМРО-ДПМНЕ, Христијан Мицкоски е против тоа операциите за промена на полот да ги покрива Фондот за здравствено осигурување.
„Разузданоста на деспотот нема крај. Кога граѓаните плачат поради неквалитетното здравство каде цената неретко е човечкиот живот и власта нема решение, сега се најавува промена на пол на државна сметка. Промената на полот е право на избор, а лекувањето на болест е нужност. Правото на живот е поголемо и поважно од сè друго. Промена на полот, не со пари на граѓаните“, порача Мицкоски.
За истото реагираше и кумановскиот градоначалник, Максим Димитриевски.„Прави со сопствениот живот што сакаш, сакај и менувај пол, лична одлука, но не на државна, а уште помалку на моја сметка. Да се разбереме, не сум против лични слободи и права, маргинализирани групи и.т.н. ги почитувам и уважувам сите, но ова е веќе навредливо. Во представничката демократија законот е воља на мнозинството (ГРАЃАНИ), не лична желба на поединци“, напиша Димитриевски на социјалните мрежи.
Промена на пол на товар на Фондот за здравствено осигурување (ФЗОМ) ќе се прави на скопските клиники, најави денеска министерот за здравство Венко Филипче.