Се продава станот каде се родил Че Гевара
Објавено во: Свет 29 Јуни, 2020
Се продава станот каде се родил славниот јужноамерикански револуционер Ернесто – Че Гевара.
Цената засега не е одредена.
Местото со површина од 240 квадратни метри, е лоцирано во зграда во неокласичен стил во градот Росарио, Аргентина. Последниот сопственик Франциско Фаруџа го купил 2002 година. Тој сакал да го претвори апартманот во културен центар, но плановите не му се оствариле, па мора да го продаде.
Че е роден 1928 година, во богато семејство од средната класа во Аргентина.
Се радикализирал, како што и самиот пишува во своите дневници – поради сиромаштијата и гладот што тој ги посведочил патувајќи ширум Јужна и Средна Америка.
Имаше клучна улога во Кубанската револуција (1953-1959), со која беше соборен лидерот Фулгенсио Батиста.
Од Куба, отишол за Боливија за да ги предводи бунтовниците против претседателот Рене Бариентос Ортуњо. Со американска помош, боливиската војска го заробила револуционерниот водач и другите негови преостанати соборци. Че е егзекутиран на 9 октомври 1967 година во селото Ла Игуера. Неговото тело е погребано на тајна локација.
Во 1997 година, неговите посмртни останки се откриени, ексхумирани и вратени во Куба, каде што тој почива.
Приврзаниците на Че и денес го гледаат како пример на посветеност и самопожртвуваност.
Неговите противници велат дека тој бил безмилосен, брутален и суров човек.