Се ребрендира најголемиот и најмоќниот синдикат - ССМ бара повисоки плати и работнички права
Објавено во: Македонија 11 Мај, 2021
Се ребрендира најголемиот и најмоќниот синдикат во земјава, Сојузот на синдикати на Македонија.
Велат дека и ребрендирани, остануваат насочени кон истата цел, а тоа е заштита на правата на работниците.
„Новото нормално, предизвикано од здравствената - ковид криза наметна насекаде во светот вклучително и во нашата држава потреба од брзо, ефикасно и стручно делување на сите субјекти со цел да се обезбеди функционирање и развој на економските и општествените односи. Во овие услови се покажа дека социјалното пратнерство е единствено можно решение за креирање на политики и стратегии и дека сите социјални партнери треба и мора да делуваат здружени за иста цел - национален опстанок и развој. Со својота посветеност и стручен ангажман насочен кон намалување на последиците од здравствената криза врз животот и здравјето на работниците и граѓаните, ССМ докажа дека е важен дел од социјалното партнерство“, потенцираат ССМ во своето соопштение до јавнста.
Нагласуваат дека нивното стручно, модерно и брзо делување и обезбедување на ефикасна онлајн достапност за потребите на членството и во услови на Ковид криза, обезбедило сигурен пристап до трудовите и егзистенцијалните права на сите работници и граѓани без исклучок и дискриминација.
„Ваквото ново и ребрендирано делување на ССМ е негова определба и предизвик и за престојниот период во кој ќе насојуваме нашите ангажмани да бидат поефикасни и повидливи за членството и работниците. Ги очекуваме нивните иницијативи и насоки затоа што сите ние сме здружени со иста цел - остварување, заштита и унапредување на работничките права.
Членството е нашата сила, неговата доверба е наша моќ и мотив за делување, сите ние заедно здружени во ССМ сме насочени кон иста цел – обезбедување на достоинство на трудот и работата изразено преку: повисоки, реални и фер плати, намалување на сиромаштијата, социјална сигурност, унапреден социјален дијалог, здрави и безбедни услови за работа, заштита на човековата околина, солидарност и еднаквост без дискриминација по ниеден основ“, потенцираат од Синдикатот.