Добивај вести на Viber
„Зелен хуман град“ алармира дека вчера во скопската општина Кисела Вода биле исечени неколку здрави повеќегодишни дрвја во населбата 11. Октомври каде што се рушат стари двокатни згради за на нивно место инвеститорот да изгради осумкатници.
Од организацијата која учествува на локалните избори од ппштината до денес не добиле ниту одобренија за градење ниту решенија за сечење зеленило на предметната локација.
- Затоа, денес се обративме и до Град Скопје со ургентно барање да ни се обезбедат решенијата за сечење зеленило, но до овој момент немаме добиено ниеден документ што го сметаме за крајно несовесно постапување на институциите имајќи предвид дека според законот за слободен пристап тие се обврзани веднаш да ни ги обезбедат информациите со кои веќе располагаат, велат од таму.
На местото на двокатници сега ќе никнат осумкатници со плус три подземни нивоа. Според поставените табли од инвеститорот, може да се види дека од постојните паркчиња, дрворедот и тревникот немаат намера да остават речиси ништо, се вели во информацијата на ова движење.
- Недозволиво е во еден од најзагадените градови во Европа и во светот здрави повеќегодишни дрвја да се сечат само зашто „на мајсторите им е полесно за работа“, реагира „Зелен хуман град“.