СЕ СПОМЕНА ЛУКСУЗНА ВИЛА: Борисов тврди дека нема имот во Барселона

Добивај вести на Viber

Немам никаков имот во Барселона, тврди бугарскиот премиер, Бојко Борисов. 

Тој во Брисел го демантираше текстот во шпанскиот весник „Ел Периодико“ дека се води истрага против него за перење пари и купување куќа во Барселона.

„По стоти пат ќе кажам дека ниту поседувам куќа, ниту имам недвижен имот, ниту сум бил во Барселона. Последен пат отидов како градоначалник пред 15 години. Не се мои пари, јас немам никаква врска со тие компании. Станува збор за луѓе кои не сум ги видел дури 15-20 години. Ниту пак некоја служба, обвинителство, полиција, ме побарале за да ме прашаат дали е тоа вистина“, вели Борисов.

Каталонската полиција и обвинителството за борба против корупцијата во Шпанија врши истрага дали Борисов е поврзан со евентуално перење пари во таа земја, објави  „Ел Периодико“.

Во март лани полицијата во Каталонија добила жалба од бугарската невладина организација MC BUUP. Како што информира „Ел Периодико“, корисник на наводните привилегии би можела да е поранешната бугарска манекенка Борислава Јовчева. Таа и нејзиниот татко учествувале во две компании со седиште во Барселона – „Numin Invest SL” и „EMA BGS SL”, кои од 2013 година имаат добиено повеќе од пет милиони евра. Тие средства би можеле да доаѓаат од физички лица, кои живеат надвор од Шпанија.