Се вклучува ли алармот: Филипче порача да не се патува во Италија
Објавено во: Македонија 24 Февруари, 2020
Здравствените власти немаат информација дали некој од Македонците кои живеат во Италија се заразени од корона вирусот. Министерот за здравство Венко Филипче рече дека ако граѓаните немаат итна потреба, треба да ги одложат патувањата за регионот на Северна Италија. Македонија е во постојан контакт со конзулот во Венеција. За денеска попладне е закажан и итен состанок со Центарот за управување со кризи. На него ќе присуствуваат и претставници од други државни институции, а на кој ќе бидат утврдени следните чекори за превенција од корона вирусот.
„Денеска бевме во интензивен контакт со нашиот конзул во Венеција. Во овој момент нема податоци дека имаме заболени или под опсервација наши граѓани во Италија. Го замоливме конзулот доколку постои механизам тој да биде известен ако некоја група наши граѓани сака да се врати во нашата земја и на тој начин ќе имаме дополнителни информации каде и кога тие би се појавиле на граничните премини, изјави Филипче.