СЕКОЈ ЗЕМЈОДЕЛЕЦ ЌЕ МОРА ДА СЕ ОСИГУРА: Владата го прави осигурувањето задолжително, нема веќе исплати од буџетот

Добивај вести на Viber

Владата планира да воведе задолжително осигурување во земјоделството, а за таа цел веќе се подготвува и нов Закон. Иако нема многу детали за иницијативата, за законското решение има информација на ЕНЕР. Со години, само мал број од земјоделците, ги осигуруваа своите посеви и добитокот, а при катастрофи и настанати штети по формирани ад-хок комисии, Владата и од буџетот вршеше обештетување на засегнатите земјоделци. Со новиот Закон практично ова решение треба да се замени со ново, да се формира Фонд за земјоделско осигурување и да се обештетува по закон.

„Во изминатиот период штетите кои настанаа во земјоделството, а се предизвикани од временски непогоди во одреден процент беа исплаќани од буџетот кај земјоделците кои не си го осигуруваа производството. Предложениот систем има за цел да ги замени постоечките ад-хок шеми за помош по катастрофи со решенија за осигурување на посевите и добитокот на државно ниво. Предлозите за системско решение со воспоствување на Фондот за земјоделско осигурување се во насока на унифицирање на надлежностите и постапките при настанувањето на штетите во земјоделството од неповолни климатски настани по еден законски основ, преку изработка и донесување на сила на Закон за задолжително земјоделско осигурување.

Според информациите на Фактор овој модел се применува во Турција, а предвидува целото земјоделство да е задолжително осигурено. Парите да се собираат во Фондот, а од настанати ситуации, обесштетувањата да се исплатуваат од склучените полиси. Тоа во иднина треба да придонесе да се намали и цената на полисите за осигурување. 

Според податоците од Агенцијата за супервизија на осигурувањето, заклучно со 30 септември 2021 година склучени 3.652 договори за земјоделско осигурување што е за 2,5 проценти помалку од лани. Земјоделците вложиле во полиси односно во осигурување точно 491,5 милиони денари или 2 проценти повеќе од лани.

Инаку тие пак од штети за овој период наплатиле 249,2 милиони денари. Од оваа сума за физички лица - земјоделци се 140,8 милиони денари, а штетите кон правни лица се 81 милиони денари.

А.Т.